अहमदनगर

नगर तालुक्यातील ‘त्या’ ग्रामदेवतेची यात्रा रद्द!

अहमदनगर  : नगर तालुक्यातील जेऊर येथील ग्रामदैवत देवी बायजामाता यात्रोत्सव कोरोनाच्या पार्श्वभूमीवर रद्द करण्यात आला आहे.     जेऊर गावचे आराध्य दैवत देवी बायजामाता यात्रोत्सव वैशाख बुद्ध पौर्णिमेला मोठ्या उत्साहात साजरा केला जातो. चालू वर्षी बुधवार दि. २६ मे रोजी होणारा यात्रोत्सव रद्द करण्यात आला आहे. तीन दिवस चालणारा व दोन दिवस कुस्त्यांचे हगामा आयोजन होत असलेला यात्रोत्सव संपूर्ण राज्यात प्रसिद्ध आहे.    यात्रोत्सव काळात ग्रामस्थांच्या वतीने बनविण्यात येणारा वांगे भाकरीचा महाप्रसाद यात्रेचे वैशिष्ट्ये असते.  बायजामाता देवस्थान जागृत देवस्थान म्हणून ओळखले जाते. यात्रोत्सव काळात देवीच्या दर्शनासाठी राज्य तसेच परराज्यातून भक्त दर्शनासाठी येत असतात. यात्रोत्सव काळात येथे लाखो रुपयांची उलाढाल होत असते.     बायजामाता यात्रोत्सव रद्द करण्याचे हे दुसरे वर्ष आहे. कोरोनाच्या पार्श्वभूमीवर देवी बायजामाता यात्रोत्सव रद्द करण्यात आला असून यादरम्यान नागरिकांनी गर्दी करु नये असे आवाहन ग्रामस्थांच्या वतीने करण्यात आले आहे.

Leave a Reply

Your email address will not be published.

Back to top button